மூன்றாம் கட்ட கஜா புயல் நிவாரணம்

 

பேரன்புள்ளம் கொண்ட ஆன்மநேய உடன்பிறப்புக்களே கடந்த மாதம் 15-11-2018 அன்று இயற்கை சீற்றமான கஜா புயலினால் சோழவள நாட்டையே பதம் பார்த்து டெல்டா மாவட்டங்களான நாகப்பட்டினம், திருவாரூர், தஞ்சாவூர், புதுக்கோட்டை மாவட்டங்களையே புரட்டி போட்டு ஒரு மாதம் காலம் கடந்தும் மக்களின் அன்றாட வாழ்க்கையையே  கேள்விக்குறியாக்கி, சொந்த மண்ணில் அகதிகளாக, ஆதரவற்றவர்களாக இன்றும் நம் கண் முன்னே காட்சி அளிப்பது சொல்லொண்ணா துயரமாக  இருக்கிறது.

 

டெல்டா மாவட்ட மக்களின் துயரத்திலும், துன்பத்திலும் பங்கு கொண்டு பல லட்சக்கணக்கான ரூபாய் மதிப்புள்ள நிவாரணப் பொருட்களை தீபம் அறக்கட்டளையின் மூலமாக வாரி வழங்கிய ஆன்மநேய உள்ளங்களை நன்றியுடன் நினைவு கூர்ந்து கடந்த 20-11-2018 அன்று முதல் கட்டமாகவும், 01-12-2018 அன்று இரண்டாம் கட்டமாகவும் சென்று கிராமம், கிராமமாக பயணித்து பல்லாயிரக்கணக்கான ஜீவர்களின் பசிப்பிணியை போக்கி நிவாரணப் பொருட்களை வழங்கிவிட்டு சென்னை திரும்பினோம்.