வள்ளலாரின் அருள்மொழிகள்

வாடிய பயிரைக் கண்டபோ தெல்லாம் வாடினேன் பசியினால் இளைத்தே
வீடுதோ றிரந்தும் பசியறா தயர்ந்த வெற்றரைக் கண்டுளம் பதைத்தேன்
நீடிய பிணியால் வருந்துகின் றோர்என் நேர்உறக் கண்டுளந் துடித்தேன்
ஈடின்மா னிகளாய் ஏழைக ளாய்நெஞ் சிளைத்தவர் தமைக்கண்டே இளைத்தேன்.

பொருள்: வாடிய பயிரைக் காணும்போதெல்லாம் நானும் வாடினேன். பசியால் மெலிந்து, வீடுவீடாக இரந்தும் பசி தீராமல் சோர்ந்தவர்களைக் கண்டு உள்ளம் பதைத்தேன். நீண்ட நோயால் வருந்துவோரை நேரில் கண்டு உள்ளம் துடித்தேன். ஈடில்லாத மானம் உடையவர்களாயிருந்தும் ஏழைகளாகி நெஞ்சம் தளர்ந்தவர்களைக் கண்டு நானும் தளர்ந்தேன்.

திருவருட்பா, ஆறாம் திருமுறை, பிள்ளைப் பெரு விண்ணப்பம், பாடல் 62

எத்துணையும் பேதமுறா தெவ்வுயிரும்
தம்உயிர்போல் எண்ணி உள்ளே
ஒத்துரிமை உடையவராய் உவக்கின்றார்
யாவர்அவர் உளந்தான் சுத்த
சித்துருவாய் எம்பெருமான் நடம்புரியும்
இடம்எனநான் தெரிந்தேன் அந்த
வித்தகர்தம் அடிக்கேவல் புரிந்திடஎன்
சிந்தைமிக விழைந்த தாலோ.

பொருள்: சிறிதும் வேறுபாடு காட்டாமல் எல்லா உயிர்களையும் தம் உயிர்போல் எண்ணி, அவற்றோடு ஒத்த உரிமை கொண்டு உள்ளம் மகிழ்பவர்கள் யாரோ, அவர்களுடைய உள்ளமே எம்பெருமான் தூய அறிவு வடிவாக நடனம் புரியும் இடம் என்று அறிந்தேன்; அந்த ஞானியரின் திருவடிக்குத் தொண்டு செய்ய என் மனம் மிகவும் விரும்புகிறது.

திருவருட்பா, ஆறாம் திருமுறை, தனித் திருஅலங்கல், பாடல் 2

சாதியு மதமுஞ் சமயமும் பொய்யென
ஆதியி லுணர்த்திய வருட்பெருஞ் ஜோதி

பொருள்: சாதி, மதம், சமயம் ஆகியவை பொய் என்பதைத் தொடக்கத்திலேயே எனக்கு உணர்த்திய அருட்பெருஞ்ஜோதியே!

திருவருட்பா, ஆறாம் திருமுறை, அருட்பெருஞ்ஜோதி அகவல், அடிகள் 211–212

கொல்லா நெறியே குருவரு ணெறியெனப்
பல்கா லெனக்குப் பகர்ந்தமெய்ச் சிவமே
உயிரெலாம் பொதுவி னுளம்பட நோக்குக
செயிரெலாம் விடுகெனச் செப்பிய சிவமே

பொருள்: கொல்லாமை நெறியே குருவின் அருள் நெறி என்று பலமுறை எனக்குச் சொன்ன மெய்ச் சிவமே! எல்லா உயிர்களையும் வேறுபாடின்றிப் பொதுவான உள்ளத்தோடு நோக்குக, குற்றங்களை எல்லாம் விடுக என்று சொன்ன சிவமே!

திருவருட்பா, ஆறாம் திருமுறை, அருட்பெருஞ்ஜோதி அகவல், அடிகள் 967–970

பசி என்கிற நெருப்பானது ஏழைகள் தேகத்தினுள் பற்றி எரிகின்ற போது ஆகாரத்தால் அவிக்கின்றதுதான் சீவகாருணியம்.

ஜீவகாருண்ய ஒழுக்கம் (உரைநடை)

பசியினால் வருந்துகின்றவர்கள் எந்தத் தேசத்தாராயினும் எந்தச் சமயத்தாராயினும் எந்தச் சாதியாராயினும் எந்தச் செய்கையாராயினும் அவர்கள் தேச ஒழுக்கம், சமய ஒழுக்கம், சாதி ஒழுக்கம், செய்கை ஒழுக்கம் முதலானவைகளைப் போதித்து விசாரியாமல், எல்லாச் சீவர்களிடத்தும் கடவுள் விளக்கம் பொதுவாக விளங்குவதை அறிந்து பொதுவாகப் பார்த்து அவரவர் ஒழுக்கத்திற்குத் தக்கபடி அவர்கள் பசியை நிவர்த்தி செய்விப்பதே சீவகாருணியம்.

ஜீவகாருண்ய ஒழுக்கம் (உரைநடை)

இதனால், அறிவு விளங்கிய சீவர்களுக்கெல்லாம் சீவகாருணியமே கடவுள் வழிபாடு என்றும் அறியப்படும்.

ஜீவகாருண்ய ஒழுக்கம் (உரைநடை)

ஜீவ ஒழுக்கமாவது: ஆண்மக்கள் பெண்மக்கள் முதலிய யாவர்களிடத்திலும், ஜாதி, சமயம், மதம், ஆசிரமம், சூத்திரம், கோத்திரம், குலம், சாஸ்திரசம்பந்தம், தேசமார்க்கம், உயர்ந்தோர் தாழ்ந்தோரென்னும் பேதம் நீங்கி, எல்லாரும் தம்மவர்களாய்ச் சமத்திற் கொள்ளுவது.

உபதேசக் குறிப்புகள்

கலையுரைத்த கற்பனையே நிலைஎனக்கொண் டாடும்
கண்மூடி வழக்கம்எலாம் மண்மூடிப் போக
மலைவறுசன் மார்க்கம்ஒன்றே நிலைபெறமெய் உலகம்
வாழ்ந்தோங்கக் கருதியருள் வழங்கினைஎன் தனக்கே

பொருள்: நூல்கள் சொன்ன கற்பனைகளையே நிலையான உண்மை என்று கொண்டாடும் கண்மூடிப் பழக்கங்கள் எல்லாம் மண்ணில் புதைந்து போகவும், தடுமாற்றம் இல்லாத சன்மார்க்கம் ஒன்றே நிலைபெற்று உலகம் வாழ்ந்து ஓங்கவும் எண்ணி எனக்கு அருள் வழங்கினாய்.

திருவருட்பா, ஆறாம் திருமுறை, திருக்கதவந் திறத்தல், பாடல் 9, முதல் நான்கு அடிகள்

இருளான மலம்அறுத் திகபரங் கண்டே
எல்லா உயிர்களும் இன்புற்று வாழ
மருளான பற்பல மார்க்கங்கள் எல்லாம்
வழிதுறை தெரியாமல் மண்மூடிப் போகத்
தெருளான சுத்தசன் மார்க்கம தொன்றே
சிறந்து விளங்கஓர் சிற்சபை காட்டும்
அருளான வீதியில் ஆடச்செய் தீரே
அருட்பெருஞ் ஜோதிஎன் ஆண்டவர் நீரே.

பொருள்: இருள் போன்ற மலம் நீங்கி, இம்மையும் மறுமையும் கண்டு எல்லா உயிர்களும் இன்புற்று வாழவும், மயக்கம் தரும் பல நெறிகள் எல்லாம் வழி தெரியாமல் மண்மூடிப் போகவும், தெளிவான சுத்த சன்மார்க்கம் ஒன்றே சிறந்து விளங்கவும், சிற்சபையைக் காட்டும் அருள் வீதியில் என்னை ஆடச் செய்தீர்; அருட்பெருஞ்ஜோதியே, நீரே என் ஆண்டவர்.

திருவருட்பா, ஆறாம் திருமுறை, அருட்பெருஞ்ஜோதி என் ஆண்டவர், பாடல் 9

ஒருமையுடன் நினதுதிரு மலரடி நினைக்கின்ற
உத்தமர்தம் உறவுவேண்டும்
உள்ஒன்று வைத்துப் புறம்பொன்று பேசுவார்
உறவுகல வாமைவேண்டும்

பொருள்: ஒருமைப்பட்ட மனத்துடன் உன் திருவடிகளை நினைக்கும் உத்தமர்களின் உறவு வேண்டும்; உள்ளே ஒன்றை வைத்து வெளியே வேறொன்று பேசுபவர்களின் உறவு கலவாமல் இருக்க வேண்டும்.

திருவருட்பா, ஐந்தாம் திருமுறை, தெய்வமணி மாலை (சென்னைக் கந்தகோட்டம்), பாடல் 8, முதல் நான்கு அடிகள்

அருட்பெருஞ்ஜோதி அருட்பெருஞ்ஜோதி
தனிப்பெருங்கருணை அருட்பெருஞ்ஜோதி

சன்மார்க்க மகாமந்திரம், vallalar.org